ئێمە لە تۆرە کۆمەڵایەتیەکان

کوردستان

بەرهەمى ئاوی دەریاچەی دووكان بۆ نیوە كەمی كرد

خەڵك- بەشی هەواڵ

دوای تێپەڕبوونی 24 كاتژمێر بەسەر گرتنەوەی ئاوی زێی بچوكدا، ئاستی بەرهەمی ئاوی دەریاچەی دووكان لە 150 مەتری سێجای رۆژانەوە بۆ 85 مەتر سێجا كەمیكردووە و بەرێوەبەری بەنداوەكەیش رونكردنەوەیەك لەسەر ئاوی خواردن بڵاودەكاتەوە.

محەمەد تاهیر، بەرێوەبەری گشتی بەنداوی دووكان بە (خەڵك)ی راگەیاند، گرتنەوەی ئاوی زێی بچوك كاریگەری نەرێنی زۆری هەیە لەسەر ژینگە و سامانی ماسی و ئاوی لە سنوری قەڵادزێ‌ و پشدەر و دواتریش كاریگەرییەكەی دەگاتە بەنداوی دووكانیش.

وتیشی”پێش گرتنەوەی ئاوەكە بەرهەمی ئاوی بەنداوەكە كە لە چەند سەرچاوەیەكەوە لە ناوخۆ و دەرەوە هەڵدەقوڵێن رۆژانە 150 مەتری سێجا بوو، بەڵام دابەزیووە بۆ 80 مەتری سێجا و پێشبینی دەكرێت بۆ رۆژانی داهاتوویش زیاتر دابەزێت و ئاستی ئاوەكەیش لە نزیك قەڵادزێ‌ بۆ 80 سانتیم دابەزیووە و زیانی زۆری بە سامانی ماسی و ژینگە گەیاندووە”.

لە مانگی حوزەیرانی ساڵی رابردوو بۆ یەكەمجار ئێران بە تەواوەتی ئاوی زێی گرتەوە و دوای هەوڵێكی زۆر بەشێكی ئاوەكەی بەردایەوە و پاشان كۆنسوڵی ئێران لە هەولێر راگەیاند، كە ئێران جارێكی تر ئامادەنیە وەك جاران ئاو بۆ هەرێم بەربداتەوە و دەبێت هەرێمی كوردستان پشت بە خۆی ببەستێت.

راپۆرت

“خەڵك” چیرۆكی قەیسەرییە تەمەن 118 ساڵانەكەی سلێمانی دەگێڕێتەوە

سلێمانی- نزار جەزا

سەدەیەك پێش ئێستا لەنێوەندی شاری سلێمانی قەیسەری نەقیب دروستكرا، كە لەئێستادا تاكە قەیسەرییە لەشاری سلێمانی وەك خۆی مابێتەوە.


لەسەدەی ڕابردوودا لەشاری سلێمانیدا چوار قەیسەری هەبوون، بەڵام بەهۆی ڕووخاندنیانەوە تەنها قەیسەری نەقیب ماوەتەوە، كە لەساڵی 1900 دروستكراوە و لەئێستادا 108 دوكان لەناو قەیسەرییەكەدا هەیە، كە تائێستا لەسەر شێوازە كۆنەكەی خۆی ماوەتەوە.

بورهانی حاجی ئیبراهیمی عەتار یەكێكە لەو خاوەن دوكانانەی قەیسەری نەقیب، كە بۆ (خەڵك)ی ڕوونكردەوە، سلێمانی لەگەڵ دامەزراندنیدا بازاڕی هەبووە، بەڵام بازاڕەكان هەموویان لەناوچوون، تەنها ئەم بازاڕِە لەشێوەدا وەك خۆی ماوەتەوە و بۆتە شوێنێكی مێژوویی و كەلەپوری.

بورهانی حاجی ئیبراهیمی عەتار بۆ پەیامنێری خەڵك دەدوێت

ئەو خاوەن دوكانە كە لەساڵی 1940 بەدواوە باوكی دوكانەكەی كڕیوە و تاكو ئێستا كاری تێدا دەكەن ئاماژەی بەوەدا، ئەم قەیسەرییە لەشێوەی گومەز یان لەسەر شێوازی قەیسەری شاری بانەی ڕۆژهەڵاتی كوردستان لەلایەن وەستای ئێرانییەوە دروستكراوە، بەڵام بەداخەوە لە ساڵانی 1990ەكان، ئەم قەیسەرییە بەهۆكاری سیاسی سوتێنرا.

بورهانی حاجی ئیبراهیمی

ئەوەشی خستەڕوو، دوای ئەم ڕووداوە هەر لەسەر شێوازەكەی خۆی نۆژەنكرایەوە و هەندێك گۆڕانكاری كراوە، بەڵام بەهۆی ئەوەی خشتی دیوارەكان بەئاگرەكە ڕەشببون، بۆیە ناچاربوون گەچكاری بكەنەوە و ڕاڕەو و دوكانەكان بچوكتركرانەوە.


لەسەرەتای دروستبونیەوە لەناوەندی قەیسەری نەقیبدا، خانێك هەبوو، بۆ ئەو كاروانییانەی لە دوورەوە دەهاتنە سلێمانی و لێی دەمانەوە، كە بۆ ئەو سەردەمە وەك خواردنگەو هوتێلێك وابووە، بەڵام ئێستا لەشوێنی ئەو خانە حەوزێكی گەورە دروستكراوە و بەدەوریشیدا چەند دوكانێك هەیە.


لەسەدەی ڕابردوودا لەپاڵ خانەكەی قەیسەری نەقیبدا، شەش خانی دیكە هەبوون، كە ئەوانیش پێكهاتوون لەخانی غەفوور ئاغا، خانی عەجەم، خانی عەبدوڵڵا درێژ، خانی حاجی سەعید ئاغا، خانە سووتاو و خانی رسوومات.

لەبارەی ئەو خانەوە بورهانی حاجی ئیبراهیمی عەتار باسیلەوەكرد، قەیسەری نەقیب پێشتر نێوەندێكی بازرگانی بوو، بەجۆرێك كاروانەكان لەدوورەوە دەهاتنە ئێرە لەخانەكە دەمانەوە و پشوویان دەدا، دواتر كاڵاكانیان (شەكر، چا، خورما و وشكە) دەفرۆشت، كە لەكەركوك و موسڵ و بەغدا و بانە و شارەكانی دیكەوە دەهاتن.


قەیسەری نەقیب لەنێوەندی سلێمانیدا بۆتە مەڵبەندی گەڕەكەكانی دەوروبەری و بەشێك لەبازاڕەكانی دیكە پێكەوە دەبەستێتەوە، چونكە چوار دەرگای هەیە، بەجۆرێك هەر یەكێكیان دەچێتەوە سەر بازاڕێكی دیكە، كە بازاڕەكانیش بریتین لە حەوزە وشكەكە، مەزادخانەكە، هەنگوین فرۆشەكان و شەقامی كاوە.


هەڵكەوتەی ئەم قەیسەرییە لەناو بازاڕی شاری سلێمانی دەكەوێتە، ڕۆژهەڵاتی گەڕەكی سەركارێز و ڕۆژئاوای گەڕەكی چوارباخ و باكووری كانیئاسكان و باشووری سەرشەقام.


حاجی ئیبراهیم فەتاح، كە لەساڵی 1972 تائێستا لەدوكانەكەیدا لە قەیسەری نەقیب كاردەكات، باسی لە ڕابردووی قەیسەرییەكە كرد و ئاماژەی بەوەدا، لەسەردەمی زوودا، بازرگان و بەرگدروو لەم قەیسەریەدا كاریاندەكرد، هەروەها كاری عەتاری و فرۆشتنی سابون و فرۆشتنی جامەدانەی تێدا دەكرا، بەڵام دواتر وردە وردە گۆڕانكاری بەسەردا هات، تاكو ئێستا كە تەنها كەلوپەلی جوانكاری و عەتاری و كەمالیات و كەلوپەلی بەرگدرووی ژنانی تێدا دەفرۆشرێت.

حاجی ئیبراهیم فەتاح

ناوبراو ئاماژەی بەوەشدا، ئێستا لەم بازاڕەدا كەمتر قازانجی ماڵی دەكرێت و فرۆشیان كەمە، چونكە زیاتر خەڵك لەدەرەوەی قەیسەرییەكە یان لەماركێتەكان كاڵاكانیان دەكڕن.

ئەوەشی ئاشكراكرد، لەماوەی دروستبوونی ئەم قەیسەرییەدا دەیان كەس لێرە كاریانكردووە و ڕۆیشتوون یان كۆچی دواییان كردووە، بەڵام ئەوەی ئاشكرایە، تاكو ئێستا 60 دوكاندار، كە لەم قەیسەرییەدا دوكانیان هەبووە، كۆچی دواییان كردووە.

لەسەدەی ڕابردوودا قەیسەرییەكانی وەسمان پاشا، شێخ مەحمود و غەفوور ئاغا لەشاری سلێمانی هەبوون، كە ئەم سێیانە ئێستا شوێنەواریان نەماوە، بەڵام ئەوەی لەئێستادا ماوەتەوە، قەیسەری نەقیبە، كە لەلایەن شێخ مستەفای نەقیب كوڕەزای كاك ئەحمەدی شێخ دروستكراوە.

بەردەوام بە لە خوێندنەوە

کوردستان

توركیا ئەنجامی ئۆپەراسیۆنێكی بۆ سەر پەكەكە ئاشكرا كرد

خەڵك- بەشی هەواڵ

سەرۆكایەتی ئەركانی سوپای توركیا ئاشكرای كرد كە دەركەوت كە یەكێك لەو سێ كەسەی لە ئەنجامی ئۆپەراسیۆنە ئاسمانییەكانی رۆژی ١٣ی تەمووز لە چالاكی خراون، لێپرسراوی لۆجستی پەكەكە، حەسەن چاكماك-ە”.

بەپێی ئاژانسی ئەنادۆڵۆ سەرۆكایەتی ئەركانی سوپای توركیاوە لە راگەیەندراوێكدا رایگەیاند حەسەن چاكماك كە نازناوی “دەلیل كاراكۆچان”ە لەگەڵ دوو كەسی دیكەدا لە میانی ئاڵوگۆڕكردنی چەك و تەقەمەنیدا، لەڕێگەی ئۆپەراسیۆنێكی ئاسمانییەوە لە چالاكی خران.

تاكو ئێستا پەكەكە لەبارەی ئەو راگەیەندراوەی سوپای توركیاوە هیچ روونكردنەوەیەكی بڵاونەكردووەتەوە.

بەردەوام بە لە خوێندنەوە

کوردستان

كۆمسیۆن كۆتا مۆڵەت بۆ ناردنی كاندیدەكان دەدات بە قەوارە سیاسییەكان

خەڵك-بەشی هەواڵ

بەڕێوەبەری گشتی پەیوەندییەكان‌و راگەیاندنی كۆمسیۆنی باڵای سەربەخۆی هەڵبژاردن و راپرسی هەرێم ئاشكرایدەكات، كۆتا مۆڵەت بۆ وەرگرتنی ناوی كاندیدەكانی قەوارەو لایەنەكان 25ی ئەم مانگەیە.

شۆڕش حەسەن بەڕێوەبەری گشتیی پەیوەندییەكان و راگەیاندنی كۆمسیۆنی باڵای سەربەخۆی هەڵبژاردن و راپرسی هەرێم بە (خەڵك)ی راگەیاند، لە بەرواری 7ی ئەم مانگەوە لایەنەكانمان ئاگادار كردووەتەوە كە ناوی كاندیدەكانیان رەوانەی كۆمسیۆن بكەن و 25ی ئەم مانگەش كۆتا مۆڵەتە بۆ وەرگرتنی ناوەكانیان.

ئاماژەی بۆ ئەوەش كرد، وەك كۆمسیۆن تەنها وردبینییان بۆ دەكەین، ئەگەر تێبینیمان لەسەر كاندیدێك هەبێت ئاگاداریان دەكەینەوە.

ناوبراو ئاشكراشیكرد، هیچ جۆرە هەوڵێك بۆ دواخستنی هەڵبژاردنەكانی هەرێم لە ئارادا نییەو هەموو ئامادەكارییەكانمان كردووە بۆ ئەوەی هەڵبژاردنەكان لەكاتی خۆیدا بكرێت.

بەپێی زانیارییەكان، كاندید بۆ پەرلەمانی كوردستان بەپێی یاسا، دەبێت تەمەنی لە 25 ساڵ كەمتر نەبێت، هەروەها پەیوەندی بە رژێمی پێشووی عێراقەوە نەبووبێت و دەستیشی بە هیچ جۆرە تاوانێكەوە نەگلابێت.

بەردەوام بە لە خوێندنەوە
ریکلام

کوردستان

دوایین