پزیشكێكی پایە بڵندی هەناوی ڕایدەگەیەنێت ، ئەو پەتایەی بڵاوبۆتەوە هێشتا ڕوون نیە، كە پەتای وەرزی و ئەنفۆلنزا یاخود جۆرێكی دیكەی كۆرۆنایە، بەهۆی ئەوەی نیشانەكانیان هاوشێوەن.
د. یاداشت ساڵح، پزیشكی پایەبڵندی هەناوی ڕایگەیاند، لەئێستادا ژمارەیەكی زۆر نەخۆش سەردانی نەخۆشخانە دەكەن، كە تووشی نیشانەكانی پەتای وەرزی و كۆرۆنا بوون، بەجۆرێك زیاد لەنیوەی سەردانیكارانی بەشی هەناوی نیشانەكانی (تا، كۆكە، لەش-داهێزران، تەنگەنەفەسی، لووت ئاووكردن و قوڕگ-ئێشە)یان هەیە.
دەشڵێـت،”ڕوون نییە، كە ئەم شەپولە نوێیە، پەتای وەرزی و ئینفلوێنزایە، یاخود جۆرێكی دیكەی كۆرۆنایە و بەهۆی ئەوەی نیشانەكانیان هاوشێوەن.
ڕاشیگەیاند، تۆی هاووڵاتی ئەگەر تووشی پەتایەكی لەو شێوە هاتیت و ئەو نیشانانەت هەبوو، دەتوانن بەپەیڕەوكردنی ئەو ڕێكارە تەندروستییانەی لەخوارەوە باسكراون هاوكاری خۆت بیت لەبەهێزكردنی تەندروستیت.
خواردنی سیر:
سیر دژە بەكتریا و دژە ڤایرۆسە پێكهاتەی ئەلیسین (Allicin)ی تێدایە، كە بەرپرسە لە بۆنە ناخۆشەكەی، بەڵام پاڵپشتیكارێكی گرنگی خڕۆكە سپییەكانە لەبەرەنگاربوونەوەی میكرۆبەكان و بەهێزبوونی بەرگری.
زینك:
خواردنی ئەو خۆراكانەی دەوڵەمەندن بە زینك، وەك: گۆشی سوور، ماسی، گوێز، پاقلەمەنییەكان، هێلكە..هتد، ڕێگری دەكەن لەزیادبوونی ڤایرۆسەكە، بەتایبەتی ڕاینۆڤایرۆس.
هەنگوین:
پێكهاتەی دژە-میكرۆبی تێدایە و یارمەتیدەرێكی باشە بۆ چارەكردنی كۆكە. بەڵام منداڵی خوار تەمەن یەك ساڵ و ئەوانەشی شەكرەیان هەیە نابێت بەكاری بێنن.
نەعنا:
پێكهاتەی دژە بەكتریای تێدایە و، هاوكارێكی باشە بۆ كەمكردنەوەی ئازار و چارەكردنی لووت گیران.
ڤیتامین C:
یارمەتی بەهێزكردنی سیستەمی بەرگری دەدات، كە لە میوەكانی وەك لیمۆ، نارنج، پرتەقاڵ، بیبەری شیرین..هتد، هەیە.
زەنجەفیل:
دوو پێكهاتەی گرنگی تێدایە، گینگیرۆڵ (Gingerol) و شاگۆڵ (Shogaol)، كە یارمەتیدەرن لە هێوركردنەوەی نیشانەكانی پەتا وەك؛ ئازار، تا، لووتگیران و هەوكردن.
پشوودان و كەمكردنەوەی قەلەقی:
گرنگە خۆت ماندوو نەكەیت و نزیك بە ۷ كاژێر پشوو بدەیت تا لەمڕێیەوە بەرگری لەشت بەهێزتربێت.
پرۆبایۆتیك:
هەندێك خۆراك هەن وەك ماست، كەلەرم، خەیارشۆر و زەیتونی سەوز، بەكتریای سوودبەخشییان تێدایە (Probiotic)، كە لەپاڵ بەكتریا سوودبەخشەكانی ناولەشمان، یارمەتیدەرێكی باشن لەبەرەنگاربوونەوەی میكرۆبەكان.
ئاشكراشیكردووە، كە ئەم ڕێكارانە یارمەتیدەرێكی باشن، بەڵام لەكاتی بوونی تەنگەنەفەسی و دژواربوونی نیشانەكان پێویستە سەردانی نەخۆشخانە بكرێت.
