کەشناسی هەرێم ڕایدەگەیەنێت، ئەمڕۆ لە هەندێک ناوچە ئەگەری تاوەباران و هەورەتریشقە هەیە.
بەڕێوەبەرایەتی گشتیی کەشناسی و بوومەلەرزەزانی هەرێم لە ڕاگەیەنراوێكدا ئاماژەی بەوەكردووە، ئەمڕۆ دوو شەممە کەش نیمچەهەور دەبێت و لە ناوچە شاخاوییەکان بۆ هەوری تەواو دەگۆڕێت، لە کاتەکانی دوای نیوەڕۆ تاکو ئێوارە لە زۆربەی ناوچە شاخاوییەکان ئەگەری تاوەباران و هەورەتریشقەی لابەلا هەیە.
ئاماژەی بەوەشکردووە، ئەمڕۆ پلەکانی گەرما (2-3) پلە نزم دەبنەوە بەراورد بە تۆمارکراوەکانی دوێنێ و لە ناوچە شاخاوییەکان پێنج پلە دادەبەزن.
لەبارەی كەشوهەوای سبەینێوە، کەشناسی هەرێم ئاماژە بۆ ئەوە دەكات، كە کەش لەنێوان ساماڵ و نیمچە هەوردا دەبێت و پلەکانی گەرما کەمێک بەرزدەبنەوە بە رادەی (1-2) پلە.
لای خۆشیەوە، ئاراس جەبار، شارەزای كەشناسی بۆ (خەڵك) ڕایگەیاند، ئاسمانی ھەرێم بەزۆری ساماڵ و کەمێک پەڵە ھەور ئەبێت و لە ئەنجامی بەردەوامی کاریگەری بارستە ھەوای فێنک لەسەر ناوچەکانمان پلەکانی گەرما زیاتر بەجێگیری ئەمێنێتەوە و لەھەندێ ناوچەدا ١ پلە بەراورد بە ئەمڕۆ بەرزدەبێتەوە.
