فەرماندەی پۆلیسی كینیا ئاماژە بە دەرهێنانەوەی 58 تەرم دەكات كە زۆربەیان لە گۆڕە بەكۆمەڵەكاندا بوون لە دارستانێك لە ڕۆژهەڵاتی وڵاتەكە و پێدەچێت تەرمی شوێنكەوتوانی مەزهەبێكی مەسیحی بن كە پێیانوایە ئەگەر لە برسێتیدا بمرن دەچنە بەهەشت.
خاچی سووری كینیا ڕایگەیاند، نەخۆشخانەیەكی ناوخۆیی بۆ گەڕان بەشوێن كەسانی ونبوودا دامەزراوە و كارمەندانی لەبارەی ونبوونی 112 كەسەوە ڕێنماییان وەرگرتووە.
لایەنگرانی مەزهەبی ئایینی سەر بە “كڵێسای نێودەوڵەتی مژدە” لە چەند كۆمەڵگەیەكی دابڕاودا لەسەر ڕووبەرێكی 800 دۆنمی و لەنێو دارستانی شاكاهۆلا دەژین.
جافێت كومی پشكنەری گشتی پۆلیسی كینیا كە سەردانی شوێنی ڕووداوەكەی كردووە ڕایگەیاندووە، لەنێو قوربانییەكاندا 50 كەس هەن كە لە گۆڕە بەكۆمەڵەكاندا دۆزراونەتەوە، جگە لە 8 كەسی تر كە بە زیندووی دۆزراونەتەوە، بەڵام باری تەندروستییان خراپ بووە و دواتر گیانیان لەدەستداوە.
ئاژانسی ڕۆیتەرز، لە زاری جافێت كومی بڵاویكردەوە، 29 كەس ڕزگار كراون و پۆلیس هێشتا بەدوای كەسانی تردا دەگەڕێت كە پێشبینی دەكرێت ڕزگاریان ببێت.
لە لێدوانێكیدا كە لەلایەن تەلەفزیۆنی كینیاوە پەخشكرا، كومی وتی”لێكۆڵەرانی پزیشكی دادوەری و بەشی تاوانی كوشتن و ئەفسەرانی تری پۆلیس و هەندێك لە شارەزایانی حكومی لە بواری زانستی نەخۆشییەكان لەگەڵماندا لێرەن بۆ ئەنجامدانی لێكۆڵینەوە و دەرهێنانەوەی تەرمەكان.
پۆڵ ماكینزی سەرۆكی تایەفە مەسحییەكە لە 14ی نیساندا دەستگیركرا، دوای ئەوەی زانیارییەكان ئاماژەی بە دۆزینەوەی چەند گۆڕێك كرد كە تەرمی لانیكەم 31 كەسی شوێنكەوتووانی تێدا بوو.
