ئێمە لە تۆرە کۆمەڵایەتیەکان
ریکلام

کوردستان

پەرلەمانتارێكی یەكێتی: هەڵپەساردنی سەرۆكایەتی هەرێم لە 30ی حوزەیران خراپترە

خەڵك-بەشی هەواڵ
دوێنێ پەرلەمانی كوردستان پرۆژەیاسای هەڵپەساردنی سەرۆكایەتی هەرێمی پەسەند، پەرلەمانتارێكی یەكێتی نیشتمانی كوردستانیش رایدەگەیەنێت، ئەوەی ئێستا دەكرێت لەلایەن چەند فراكسیۆنێكەوە، یەكێتی لە 30 حوزەیران نەیكرد.

فراكسیۆنی گۆڕان پڕۆژە یاسایەكی بۆ هەڵپەساردنی دامەزراوەی سەرۆكایەتی هەرێمی كوردستان دایە پەرلەمان‌و فراكسیۆنی یەكگرتووش داوا دەكات دامەزراوەی هەرێم و پۆستی سەرۆكی هەرێم هەڵبوەشێتەوە، چونكە بوەتە هۆكار بۆ نەهامەتی هەرێم.

عەباس فەتاح ئەندامی پەرلەمانی كوردستان لە فراكسیۆنی یەكێتی نیشتمانی كوردستان بە (خەڵك)ی راگەیاند، ئەمە تەنها پڕۆژەیەكەو هیچیتر، كاتی خۆی لە 30 حوزەیران دەیانوت یەكێتی نیشتمانی وادەی سەرۆكایەتی درێژ كردوەتەوە، بەڵام هێندەی ئەوە گەورەتری نەكردبوو كە ئێستا ئەمانە كردوویانە.

وتیشی “پێمانوابوو كە سیستمەكە بكەینە سیستمی پەرلەمانی و لە پەرلەمانەوە سەرۆكایەتی هەرێم هەڵبژێردرێت، بەڵام ئەمانە پێیان وایە لەم قۆناغەدا پێویست ناكات سەرۆكایەتی هەرێم هەڵبژێدرێت‌و پڕۆژەیەكیان هەموار كردووەو ئەمڕۆ دەبێتە یاسا”.

ئاماژەی بۆ ئەوەش كرد، هەر بابەتێك ببێتە هۆی ئارامی لە كوردستان‌و هەوڵدان بۆ چارەسەركردنی ژیانی خەڵك ئێمە پشتیوانی لێدەكەین، هیوادارین ئەمە هەنگاوێك بێت كە پێم وایە ئەمەشیان تەنها سیناریۆیە كە لەم وڵاتەی ئێمە دەكرێت.

سەبارەت بە خۆكاندیدكردنەوەی مەسعود بارزانی بۆ پۆستی سەرۆكی هەرێم بە پێی ئەم پڕۆژە یاسایە عەباس فەتاح رایگەیاند، ئەگەر دەستوور بنوسرێتەوە بەڵێ دەتوانێت خۆی كاندید بكاتەوە، ئەگەر یاساش جێبەجێ بكرێت، نەخێر ناتوانێت، بەڵام ئەگەر نەكرێت هەموو رۆژێك دەتوانێت خۆی كاندید بكات.

کوردستان

کوڕەزایەکی خومەینی ھاوشێوەی باپیری لە نەجەف نیشتەجێ دەبێت

خەڵک-

میدیاکانی ئێران ئاماژە بەوە دەکەن، نەوەیەکی ئایەتوڵڵا خومەینی بە نیازە بێتە شاری نەجەف و بۆ ماوەی چەند ساڵێک ھاوشێوەی باپیرەی، لەو شارە بمێنێتەوە.

وەک ئەوەی میدیاکانی ئێران دەڵێن، بڕیارە عەلی خومەینی، نەوەی روحوڵڵا خومەینی ڕابەری شۆڕشی ئیسلامیی شوێنی نیشتەجێبوونی خۆی بۆ شاری نەجەف بگوازێتەوە و بۆ ماوەی چەند ساڵێک ھاوشێوەی باپیرەی لەو شارە نیشتەجێ ببێت.

عەلی خومەینی تەمەنی ٣٣ ساڵە و کوڕی ئەحمەد خومەینییە کە چەند ساڵێک پاش مردنی باوکی بەھۆکارێکی نادیار گیانی لەدەستداوە.

روحوڵڵا خومەینی کە لە حەفتانی سەدەی ڕابردوو لە ئێران ھەڵات، ڕووی لە شاری نەجەف کرد و بۆ ماوەی چەند ساڵێک لەو شارە مایەوە، دواتر لەسەر داوای ئێران، حکومەتی ئەوکاتی عیراق لە نەجەف دەریکرد و رۆشتە فەرەنسا و تا شوباتی ١٩٧٩ لەو وڵاتە مایەوە و دواتر گەڕایەوە ئێران.

 

بەردەوام بە لە خوێندنەوە

کوردستان

پارتی: خێزانی فوئاد حسێن مەسیحییە نەک جولەکە

خەڵک-

پاش کاندید کردنی فوئاد حسێن سەرۆکی دیوانی سەرۆکایەتیی ھەرێمی کوردستان بۆ پۆستی سەرۆکایەتیی کۆماری عیراق، چەند میدیا و تۆڕی کۆمەڵایەتیی عیراق بڵاویانکردەوە، خێزانی ناوبراو جولەکەیە و لە کاتی ھەڵبژاردنی بە سەرۆک کۆمار، ژنێکی جولەکە دەبێت بە خانمی یەکەمی عیراق.

بەڵام سۆمەرییە نیوز، لە زاری رێناس جانۆ پەرلەمانتاری پێشووی پارتی لە پەرلەمانی عیراق، ڕایگەیاندووە: “خێزانی فوئاد حسێن خانمێكی ھۆڵەندییە و بە ئایین مه‌سیحی پرۆتیستانتە‌، ئەو ژنە له‌ بنه‌ماڵه‌ی مۆنتسۆرییه‌ كه‌ له‌هه‌مو ئه‌وروپا به‌ناوبانگن نه‌ك ته‌نیا له‌ هۆڵه‌ندا.”

ئەوەشی ڕاگەیاندووە: “بنه‌ماڵه‌ی مۆنتسۆری خزمه‌تێكی زۆریان له‌بواری په‌روه‌رده‌ و فێركردندا كردووه‌ و ماریا مۆنتسۆری یه‌كێكه‌ له‌ بیرمه‌نده‌كانی ئه‌و بنه‌ماڵه‌یه ‌کە خاوه‌نی هه‌زاران قوتابخانه‌ن له‌ سه‌رتاسه‌ری دنیادا.”

 

بەردەوام بە لە خوێندنەوە

کوردستان

بە وشکبوونی دەریاچەی ورمێ شارێک نامێنێت بە ناوی تەبرێز

خەڵک-

جێگری سه‌رۆكی رێكخراوی پاراستنی ژینگه‌ی ئێران ئاماژە بەوە دەکات، ئەگەر دەریاچەی ورمێ وشک ببێت، ئەوا شارێک نامێنێت بە ناوی تەبرێزەوە.

مه‌سعود ته‌جریشی جێگری سه‌رۆكی رێكخراوی پاراستنی ژینگه‌ی ئێران لە میانی وتووێژێکی لەگەڵ رۆژنامەی (کارگران) دا ڕەخنەی توندی لە بەرپرسانی ئێران گرت سەبارەت بە فەرامۆشکردنی کارەساتی وشکبوونی دەریاچەی ورمێ.

ئەو ڕاگەیاندووە: “ئه‌گه‌ر ده‌ریاچه‌ی ورمێ وشك بكات، ئه‌وا شارێك نامێنێت به‌ناوی ته‌برێز و پێویسته‌ ئەو شارە لە شوێنی خۆی بگوازرێته‌وه.”

ئەوەشی ڕاگەیاندووە: وشكبوونی ده‌ریاچه‌كه‌ جگە لەوەی تەبرێز دەمرێنێت، كاریگه‌ری نه‌رێنی ده‌كاته‌ سه‌ر دانیشتوانی ناوچەکە، كه‌ ژیان و گوزه‌رانیان له‌سه‌ر كشتوكاڵ و ئاژه‌ڵدارییه، بۆیە پێویستە ھەرچی لەدەست دەێت بکرێت تا ڕێ بگیرێت لە وشکبوونی تەواوی دەریاچەکە.

ده‌ریاچه‌ی ورمێ پێش بچوکبوونەوە بە دووه‌م گه‌وره‌ترین ده‌ریاچه‌ی سوێر له‌ جیهان ھەژمار دەکرا، ئەو دەریاچەیە ده‌كه‌وێته‌ نێوان پارێزگاکانی ئازه‌ربایجانی خۆرئاوا و ئازه‌ربایجانی خۆرهه‌ڵات، پێش دەستپێک وشكبوونەکەی، ڕووبه‌ری ده‌ریاچه‌كه‌ ٥ هه‌زار و ٢٠٠ كیلۆمه‌تر چوارگۆشه‌ بوو، لە ئێستاشدا تەنھا نزیکی ٢٠٪ ـی ڕووبەرەکەی ئاوی تیا ماوە و نزیک بە شاری ورمێیە لە رۆژھەڵاتی کوردستان.

شاری تەبرێزیش دوای تاران و مەشھەد سێیەمین گەورەترین شاری ئێرانە و بەپێی داتای ساڵی ٢٠١٦، دانیشتووانی شارەکە نزیک بە ٢ ملیۆن و ٥٠٠ ھەزار کەسە، زۆرینەی دانیشتووانەکەشی تورکی ئازەرین، کوردیش بە پلەی دووەم دێن لە شارەکە.

ئەم وێنەیەش قەبارەی دەریاچەکە پیشاندەدات لە نێوان ساڵانی ٢٠٠٠ تا ٢٠١٤

بەردەوام بە لە خوێندنەوە
ریکلام
ریکلام
ریکلام

کوردستان

دوایین